En conserva

Onte recibimos a visita de Emilio, o pai de Irene.
Emilio é biólogo, e traballa na Frinsa.
Explicounos moi ben toda a secuencia necesaria para facer unha lata de conserva: desde que o peixe chega en camións ás naves, ata que sae, outra vez en camións, envasado en latas.
Pasa por un montón de procesos: limpalo, cocelo, cortalo, metelo nas latas, esterilizar as latas...
Emilio traballa na zona onde se fan as análises para comprobar a calidade das conservas xa feitas.

Todo iso estivo moi interesante. Pero é que ademais...tróuxonos varias latas, para probar! E de verdade que demos boa conta delas...

Experimento sobre a conservación dos alimentos

Despois dalgún tempo traballando na cociña e sobre o tema dos alimentos, hai unha pregunta que nos ronda a cabeza: canto tempo se conservan os alimentos? Que pasa se os deixamos fóra da neveira, sen utilizar ningunha técnica de conservación?
Para comprobalo, realizamos un experimento. Collemos varios alimentos: iogur, queixo, un anaco de mazá, un anaco de tomate, un anaco de pan, e garavanzos.
Antes de nada, fixemos as nosas hipóteses sobre o que pasaría con cada un deles. Podrecerían? Que aspecto collerían? Aparecerían bichos? Poñeríanse negros? Ulirían mal? Secarían? Cadaquén fixo as súas propostas e escolleu o que lle parecía que pasaría con cada alimento.

Logo, nas seguintes dúas semanas, fomos comprobando e anotando no noso cadro de observacións.
O tomate, enseguida empezou a coller mal aspecto: púxose moi brando, encheuse de líquido, colleu manchas negras, e un cheiro nauseabundo. Tivemos que tiralo! O iogur encheuse de mofo, así que aproveitamos para ver unha curta sobre o que era o mofo e como se reproducía. A mazá e o queixo tardaron bastante máis en estragarse. O pan púxose duro coma un croio. E os garavanzos quedaron intactos!
Por que? A profe explicounos que era porque foran sometidos a un proceso de secado. Cando os alimentos están ben secos, consérvanse moito mellor, xa que o mofo, para aparecer e reproducirse, precisa ter humidade e unha temperatura tirando a quente.
Aproveitamos para falar sobre métodos para conservar os alimentos.
Xa sabemos que, canto máis secos e con temperatura fresca, mellor!

Temos visita

Dentro do programa de colaboración entre familias e escola, que continuamos este curso, a semana pasada estivo con nós Manola, a nai de Sabela.

Como sabedes, estamos traballando nun proxecto de cociña. Así que Manola ofreceuse a virnos falar de que é iso dos nutrientes, que tipos hai, como os dixire o corpo...
Tamén nos falou dalgúns problemas metabólicos, como a diabetes, da que temos algún caso no colexio. Ata nos mostrou o aparello que utilizan as persoas diabéticas para medir o nivel de glucosa.
Debeulles gustar moito, porque, como ben vedes, despedírona con moito agarimo.
Agardamos ter pronto algunha outra visita de familias!